• Delightcantopop 悅•與•歌

集合吧!地球保衛隊 by 悦與歌


長命火就長命救。


經歷三年多獨立發展嘅時間,C AllStar四子終於再度合體,而回歸之作係一首令人相當感動嘅歌《集合吧!地球保衛隊》。


比起2019同2020年唔少鼓勵人唔好放棄,要喺絕望之中保持希望嘅歌,2020年底至2021年出嘅歌就多咗個概念,就係無論大家意志幾堅強都好,都要接受現實,唔係有意志同唔放棄就大哂。當外在環境唔容許我哋繼續硬碰時,請好好保持實力。


由《明年見》嘅「今天你必須休息好好脫險」到《多喝水》嘅「長命先可以撐過去」,來到今次《集合吧!地球保衛隊》有「長命火就長命救」同「人在志在人就夠」,都係叫我哋好好保重,因為好老土咁講「人無事先做到世界冠軍」。


除咗叫大家保重留力打呢場長命仗之外,呢首歌亦用「集合」去話比大家聽團結嘅需要。一場持久戰之中有人會中途離隊,可能因為意見分歧,可能因為自己有其他事情兼顧,正正人係獨立個體有自己思維同決定,但有需要嘅時候,大家就要再集合,團結一致槍口對外。或者正正係因為曾經分開過,更加明白集合嘅重要,同時亦更加能發揮自己最好嘅一面。


C AllStar都歸隊集合啦,香港人呢?


《集合吧!地球保衛隊》 曲:頼映彤 詞:梁栢堅 編:頼映彤 監:簡 主唱:C AllStar Official MV: https://youtu.be/8uCbyzHFXsc

音樂火鍋 Music Hotpot

Facebook: www.facebook.com/musichotpot