更像個人 by 悦與歌

作為廣東歌支持者，係非常樂見甚至好鼓勵母語唔係廣東話嘅歌手嘗試去唱廣東歌，因為咁通常代表呢位歌手對香港呢個地方同廣東歌呢個文化嘅重視。比較出名嘅例子有楊丞林2008年同陳柏宇合唱嘅《理智與感情》同今年首支獨唱作品《我不認識你》，當然亦有2016年林宥嘉嘅《壞與更壞》。

到最近，兩位香港嘅音樂人（包括作曲奚伊妮同填詞人李冠麟）就同一位台灣歌手蘇瓦那合作製作呢首新廣東話歌《更像個人》。

有參與早前「埋班作樂」計劃嘅填詞人李冠麟表示呢首作品係一場「廣東歌實驗」，因為佢係「先詞後曲」，先寫好歌詞再為詞度旋律。呢種創作方式比較難套用喺廣東歌，因為眾所周知廣東話有9聲，有部份聲調比較難對應音符，如果「先詞後曲」可能會限制旋律上嘅多樣性同變化。呢個方法做歌對填詞人或許較易，但對作曲人或者演唱者來講就會相對更難。

更唔好講，今次主唱蘇瓦那係一位唔太識廣東話嘅台灣原住民歌手。所以，最終能夠製成呢首歌《更像個人》其實真係好難得，即使蘇瓦那因為語言限制唔能夠將呢首歌嘅意思徹底演繹，但淨係呢個願意為對岸香港文化令出嘅心，就值得大家欣賞。

大家不妨花四分幾鐘，欣賞下香港年輕音樂人同台灣原住民為香港製作同演繹呢首《更像個人》。

曲：奚伊妮、Suana Emuy Cilangasay 蘇瓦那

詞：李冠麟

編、主唱：Suana E. Cilangasay