十分錯 by 悦與歌

近幾年越來越多獨唱歌出完之後出合唱版，今年嘅數目更創新高，由年初《高攀愛》開始，接連有《無他》、《別為我好》、《南昌街王子》、《蝸牛》同最近喺串流平台上熱播嘅《隔離》。之前都提過呢種方式其實主要宣傳為主，令原唱單曲更受歡迎。但其實好多時合唱版效果都一般，或者因為歌曲本身旋律同音域係為原唱度身訂造，加入另一把聲（特別係異性）有機會出現其中一個人把聲勉強遷就另一個，或者本身兩把聲嘅特質唔太適合合唱嘅情況。

最新就有JUDE新歌《十分錯》搵來MV男主角MC張天賦合唱，都出現類似情況。MC唔係唔唱得，之前佢cover《謝謝對不起》其實都見到佢唱功根基好好，演繹得好有感染力，但佢本身音域以男聲來講屬於偏高，加上佢聲線本身好響亮，配上同樣唱高音為主但聲線偏弱嘅JUDE，咁嘅配置合唱唔太夾得埋。對比《隔離》搵一把中低音較好、唱法比較溫和嘅林家謙去襯托Jace，《十分錯》呢個合唱配置確實效果唔太理想，做唔到「1+1>2」嘅效果。

對比下，其實我更有興趣聽MC自己cover《十分錯》，或者會有另一種感覺。

《十分錯 (with MC張天賦)》

曲：JUDE / 周柏豪 / 徐浩

詞：林若寧

編、監：徐浩

主唱：JUDE 曾若華 / 張天賦 - 以父之名 Tinfu Mc